बारावीच्या विद्यार्थ्यांची बोर्डाची प्रात्यक्षिक परीक्षा ८ ते २५ फेब्रुवारी या कालाधीत होणार आहे. या काळात विद्यार्थ्यांचा पर्यावरण प्रकल्प, तोंडी व लेखी परीक्षा, भाषाविषयी तोंडी व लेखी परीक्षा, विज्ञान व भूगोल विषयाची प्रात्यक्षिक परीक्षा कॉलेजांमध्ये आयोजित केली जाणार आहे. या परीक्षेचे साहित्य बोर्डाने सोमवारी जिल्ह्यातील माध्यमिक शाळा व कॉलेजांना वाटले. यामध्ये प्रात्यक्षिक परीक्षेला नियुक्त केलेल्या शिक्षकांची यादी, प्रात्यक्षिक परीक्षेचे विद्यार्थ्यांना गुण देण्यासाठीचा तक्ता, बारावीच्या परीक्षेचे वेळापत्रक यांचा समावेश होता. तर, मागील वर्षी बारावी परीक्षा उत्तीर्ण झालेल्या विद्यार्थ्यांचे प्रमाणपत्रसुद्धा सोमवारी शाळा, कॉलेजांना देण्यात आले. याशिवाय यंदाच्या वर्षी बारावी परीक्षेला पात्र असणाऱ्या विद्यार्थ्यांचे हॉलतिकीट शाळा, कॉलेजांच्या प्रतिनिधींकडे देण्यात आले आहेत. कॉलेजांच्या प्रतिनिधींनी हे सर्व साहित्य व्यवस्थित तपासून घेतले. दरम्यान, परीक्षेच्या नियोजनासाठी आता ९ फेब्रुवारी रोजी केंद्र संचालकांची बैठक आयोजित केली असून बोर्डाचे व शिक्षण विभागाचे अधिकारी उपस्थित राहणार आहेत.
